減肥餐單有冇用?健身教練教你點食最好!

健康嘅人生,除咗適量運動之外,控制飲食都十分重要。社交媒體經常流傳不同明星嘅減磅餐單,單靠短短幾日嘅斷食或者地獄式餐單瘦幾公斤,雖然聽落好吸引,但未必可以持久有效地減磅。唔少人亦會因為擔心攝取過量卡路里而選擇節食或者用單一食物減肥法,捱住餓又點會有力工作同做運動呢?其實一個健康飲食習慣,係由多種觀念去實行。

BMR同TDEE點影響飲食? 

成日聽人講計住卡路里做人,到底點先知道自己應該食幾多飲幾多?食幾多係咪真係整定?首先要了解 BMR 基礎代謝率同 TDEE 總熱量消耗。
BMR 基礎代謝率係身體要維持最基本運作所需嘅熱量,即係你唔郁嘅時候,身體一日需要消耗嘅熱量。你嘅體重、年齡、肌肉量,都會影響你基礎代謝率,尤其係年紀愈大,你嘅BMR就會慢慢下降,代謝慢慢愈差,所以就會有中年發福嘅問題。

TDEE 總熱量消耗係指身體一整日所消耗嘅熱量,除咗身體維持基本功能嘅熱量,亦包括你郁動同運動所消耗嘅熱量。

無論你想增肌定減脂,首先要知道自己嘅BMR同TDEE,先可以知道自己每日可以食幾多。食幾多未必真係整定,如果你嘅運動量多,需要嘅熱量亦相當會較多;如果相對比較少運動,餐餐大魚大肉當然亦會令你離你嘅健康目標更遠。

單一食物減肥法真係work? 

單一食物減肥法除咗可能令人捱餓,食物種類亦相對較少。以下係三種常見嘅單一食物減肥法:

節食減肥法

唔少選擇節食嘅朋友,因為想短時間內可以減脂,所以會減少自己食量。節食除咗會影響賀爾蒙之外,亦會導致血糖突然下降,出現暈眩等問題。頭先提過基礎代謝率,如果攝取過少嘅熱量,身體亦會因為無法維持最基本嘅運作而出現警號。當身體習慣咗低熱量嘅壞習慣後,有日突然攝取多咗熱量,身體就會將難得多咗嘅熱量立刻儲存為脂肪,所以唔少朋友因為節食完而肥返兩個碼。

蛋白質減肥法

唔少有健身嘅朋友為咗增肌,會增加食物裡可攝取蛋白質,例如多食雞胸、雞蛋、三文魚等。蛋白質消化過程較慢,所以進食量唔需要太多,都會有飽肚嘅感覺。進行蛋白質減肥法亦會控制澱粉攝取量,包括唔食飯麵等主食。短期嘅減脂當然有幫助,但長期減澱會令人處於低血糖狀態,更會影響精神同抵抗力。

蔬果減肥法

蔬果減肥法聽落好似好健康,不過單靠食草其實仲危險過節食!蔬菜本身熱量唔高,不過長期只靠食菜,不但缺乏營養,甚至會影響賀爾蒙同月經,出現脫髮、皮膚變差等問題。而水果本身糖分較高,食得太多生果,都會影響血糖㗎。

食得?唔食得?點揀先得呀?

無論係節食減肥、多肉走澱定係淨係食蔬果,都有佢哋嘅可取之處。任何一種飲食減肥法,都只可以當作短時間迅速減磅嘅方法,一停咗就會反彈。 多肉少澱、多蔬果,其實已經係一個十分健康嘅選擇。

世界上唔會有一個減肥餐單係可以適合所有人,健康生活習慣亦唔應該係一個星期內可以達到嘅目標。減脂最重要嘅誡條就係食得比TDEE少,同時選擇健康嘅飲食方式。都市人出街食飯,其實都有好多健康嘅選擇,從原型食物出發,避開加工食品同高油、高糖嘅食物,不出三個月,你都會感受到身體嘅變化。

健康嘅生活應該係感受運動嘅快樂之餘,亦可以享受健康飲食。如果大家對健康飲食有咩疑問,我哋嘅註冊營養師都可以幫到你,了解你嘅體質,同你一齊邁向你嘅健康目標。

Share on facebook
Facebook
Share on telegram
Telegram
Share on whatsapp
WhatsApp
Share on email
Email

閱讀更多文章

Leave a Comment

你的電郵地址並不會被公開。 必要欄位標記為 *

× 查詢健身課程