減肥減極都唔瘦?一文話你知做錯咩

每個人心目中都有自己希望達到嘅理想身形,但經常運動嘅你,揮灑汗水後,仲係覺得離理想身形有一段好漫長嘅路?其實除咗運動之外,其他因素都會影響你嘅健身進度。健身專家為你打破N項運動迷思,重塑你嘅健康人生!

#1: 理想身形過份「理想」

每個人對於「理想身形」都有唔同嘅定義,喺訂立自己嘅健身目標前,除咗考慮體重、BMI (Body Mass Index)之外,其實肌肉量、體脂助率、內臟脂肪等,對了解自己嘅身體狀況同目標都十分有幫助。如果有去健身房嘅習慣,不妨去睇吓有無Inbody身體組成分析儀,了解自己身體不同部份嘅脂肪、肌肉量,亦可以知道自己嘅體態有咩需要改變嘅地方。要記住,體重唔係唯一量度身形嘅指標,

當然,如果搵唔到Inbody分析儀,亦可以買一部功能比較全面嘅電子磅,可以量度體重、體內水份、內臟脂肪、基礎新陳代謝率等。要記住,體重唔係唯一量度身形嘅指標,好好了解自己嘅身體狀況,先可以訂定短期同長期嘅目標,慢慢向你嘅理想身形邁進。

#2: 不合適的運動計劃

承接上一個部份,要了解自己身體嘅狀況,先可以訂立一個適合自己嘅運動計劃。唔少人都會相信「只要出汗就係燃消脂肪」嘅想法,其實呢個說法唔係錯,但唔會係絕對正確,流汗絕對唔等於燃脂,而身體嘅脂肪亦唔會因為流汗而排出體外。運動時流汗其中一個原因係要幫助身體散熱,令身體新陳代謝順暢,但如果將流汗視為消脂嘅指標,就係大錯特錯。

要訂立一個適合自己嘅運動計劃,不得不提就係帶氧運動。常見嘅帶氧運動,例如跑步、游水等,強度比較低,亦需要多啲時間先可以達到燃脂嘅效果。除咗做帶氧運動之外,亦可以加入不同嘅重量訓練,令肌肉線條更明顯。唔少女仔都擔心重訓會令自己變得大隻,其實喺運動計劃中加入適當嘅重量,做到減脂增肌,會令身形睇落更健康,亦唔需要擔心會復胖。

做任何運動之前,記得要先熱身,亦需要衡量自己嘅身體狀況,千萬唔好諗住一步登天,慢慢加強訓練嘅強度,俾身體習慣同適應,先可以享受到做運動嘅樂趣同功效。運動後記得要補水、拉筋,亦記得要好好休息。千祈唔好諗住日日做運動就可以快啲達到理想身形,制定休息日,俾肌肉同運動休息,先可以走更遠嘅路!

#3: 飲食習慣出事

成日聽人講「七分飲食,三分運動」,其實係真㗎!只要熱量攝取比消耗量低,想唔瘦都幾難。有不少嘅朋友諗住努力做運動就會達到目標,但係做完運動轉個頭就去食大餐,其實只會白費之前嘅心機。每日飲至少兩公升水,避免食過量高卡路里嘅食物,攝取唔同嘅營養,控制想食快餐嘅邪念,已經幫到好多忙。

當然,唔係人人都可以計算到每餐嘅卡路里有幾多,美食當前,最緊要係 “Always make healthier choices” (揀較健康嘅選擇)。減少攝取糖分,唔單止係戒珍珠奶茶、凍檸茶等糖分極高嘅飲品,其實餸菜入面嘅醬汁,例如沙茶醬、甜酸醬、燒汁等,都有好高嘅糖分。如果出街食飯,記得要盡量少汁或者走汁。

想知道點樣先可以達到自己嘅理想身形?做運動遇到平台期?搵我哋傾下啦!每個人都有自己想達到嘅目標,無論你嘅理想身形係點樣,訂立一個適合自己嘅運動同飲食計劃,係成功嘅第一步。運動除咗令人健康,亦會使人快樂,希望大家都可以好好享受運動嘅樂趣!

Share on facebook
Facebook
Share on telegram
Telegram
Share on whatsapp
WhatsApp
Share on email
Email

閱讀更多文章

Leave a Comment

你的電郵地址並不會被公開。 必要欄位標記為 *

× 查詢健身課程