瑜珈可以減肥嗎?係唔係運動?

講起運動,瑜珈係唔少女性鐘意嘅運動之一。除咗古典瑜珈之外,近年外國興起咗不同類型嘅瑜珈,包括孕婦瑜珈、大笑瑜珈、水上瑜珈等。當中亦有標榜可以減壓,同時可以減肥。其實,做瑜珈真係可以減肥嗎?今日為大家打破瑜珈迷思,一齊了解唔同類型嘅瑜珈有咩好處!

細數瑜珈好處

  • 瑜珈提倡修身養心,當中所練習嘅呼吸法同冥想,可以幫助放鬆心情,舒緩壓力
  • 瑜珈嘅動作可以提升柔韌度,糾正日常中不正確嘅姿勢,改善肩頸痛、脊椎問題
  • 瑜珈有不同類型同強度嘅伸展動作,可以放鬆同拉鬆繃緊嘅肌肉,同時促進血液循環
  • 伸展同拉筋動作可以塑造身體線條,亦有助促進新陳代謝

瑜珈可以減肥嗎?可以取代其他帶氧運動嗎?

如果你嘅目標係想燃燒卡路里或者增肌,咁瑜珈未必可以幫到達到你嘅理想健康目標。瑜珈雖然屬於帶氧運動,但亦都係比較溫和緩慢嘅活動。的確,瑜珈中練習嘅拉筋、伸展運動可以幫助塑造肌肉線條,如果目標係想減磅或者燒脂,不妨留意以下推介嘅熱門瑜珈類型!

五種熱門瑜珈類型

古典瑜珈 / 哈達瑜珈 (Hatha Yoga) 

哈達瑜珈係一般瑜珈嘅統稱,傳統嘅哈達瑜珈著重調身同調息,即係體位法同呼吸法,同時會配合冥想,希望可以透過三者嘅組合,緩解不安、負面情緒。哈達瑜珈強度較低,屬於比較靜態嘅伸展運動,同時亦會透過唔同嘅動作組合,幫助放鬆繃緊嘅骨骼同肌肉。哈達瑜珈十分適合生活節奏急速嘅香港人,放鬆心情同舒緩日常生活嘅壓力。

流動瑜珈 (Flow Yoga / Vinyasa) 

流動瑜珈特別嘅地方在於動作與動作之間嘅流暢同連貫,透過吸氣同呼氣之間,將不同嘅動作用呼吸串連,所以當中嘅節奏都會比較快。流動瑜珈亦十分著重瑜珈動作同呼吸嘅同步,所以每組動作之間無間斷。流動瑜珈可以訓練呼吸,增進心肺功能,亦可以提升身體靈活性,同時促進血液循環。

高溫瑜珈 (Bikram Yoga / Hot Yoga)

顧名思義,高溫瑜珈係喺約38℃-40℃嘅高溫環境做瑜珈。透過熱能同固定動作,相比其他瑜珈動作,高溫瑜珈可以大量出汗,有助排出體內毒素。除此之外,高溫瑜珈嘅環境令身體柔軟度變好,可以更加容易伸展身體,無咁容易拉傷之餘,亦可以練習到平時做唔到嘅伸展動作,十分適合初學瑜珈或者長期缺乏運動嘅人。

強力瑜珈 / 能量瑜珈 (Power Yoga) 

強力瑜珈係由古典瑜珈發展出嚟嘅新興瑜珈,主要激發體能,提升身體耐力嘅極限。強力瑜珈揉合古典瑜珈嘅呼吸訓練同鍛練心肺功能嘅運動量,當中所設計嘅訓練姿勢同呼吸方式以鍛練身體為目標。強力瑜珈亦可以改善同訓練核心肌肉群,燃燒脂肪。因為需要消耗較多嘅體能同肺活量,想接觸強力瑜珈嘅朋友,記得要衡量自己嘅體能呀!

空中瑜珈 (Aerial Yoga) 

空中瑜珈主要目標係雕塑身型,運用懸吊嘅布帶或者吊床,喺半空中做瑜珈動作。空中瑜珈可以訓練核心肌群,亦會運用全身嘅肌肉。喺空中做出大量倒吊動作,有助血液循環。除此之外,空中瑜珈亦會訓練到身體嘅平衡同協調,有助改善平日不良嘅姿勢, 舒緩脊椎問題。因為有布帶輔助,所以可以輕易做出平時喺平地做唔到嘅伸展運動,即使係筋骨比較僵硬嘅朋友都可以輕易做到瑜珈動作。

無論任何一種運動,最重要係了解自己嘅目標同適唔適合自己,如果想知道更多關於健康同運動嘅資訊,不妨同我哋傾吓!

Share on facebook
Facebook
Share on telegram
Telegram
Share on whatsapp
WhatsApp
Share on email
Email

閱讀更多文章

Leave a comment

你的電郵地址並不會被公開。 必要欄位標記為 *

× 查詢健身課程