咩係間歇斷食?咩係生酮飲食?邊種方法對瘦身比較有效?

間歇斷食同生酮飲食都係近幾年非常熱門嘅減肥瘦身飲食方法,咁到底兩者有咩唔同?邊種方法會比較有效?今次就為大家分析下呢兩種飲食方式!

咩係間歇斷食?

間歇斷食嘅目的係透過足夠時間嘅斷食,引導身體燃燒脂肪作為能量來源。一般食物經消化吸收後,會分解成葡萄糖作為身體能量嘅來源,而剩低嘅葡萄糖就會轉化成肝醣或脂肪。喺空腹大約 12 至 16 個鐘頭後,體內嘅葡萄糖同肝醣就會差唔多俾身體完全消耗。呢個時候,身體就會開始燃燒脂肪嚟為身體提供能量。

而間歇斷食都有分好幾種,其中最普遍嘅方式就係「186間歇斷食」。姐係一日 24 小時內有 16 個鐘係斷食,集中喺剩低嗰 8 個鐘內進食。呢種係比較入門、易適應嘅間歇斷食方式,只要將早餐推遲幾個鐘、晚餐提早幾個鐘進食就可以。

至於喺 8 個鐘內要食啲咩、食幾多餐就反而冇咁多限制,但都要均衡營養同攝取唔多過你身體所需嘅熱量。切忌因長時間禁食後想要好好犒賞自己,而喺非斷食嘅時間內暴飲暴食,造成反效果。

咩係生酮飲食?

生酮飲食嘅意思係指可以令身體產「生」「酮」體嘅飲食方法。而酮體就係身體燃燒脂肪後嘅代謝產物,所以成功令身體產生酮體,就等於知道身體正以燃燒脂肪嚟到取代葡萄糖作為能量來源。

要令到身體產生夠多嘅酮體,就必須要令到肝醣同胰島素夠低。而透過維持攝取極低碳水化合物、少量蛋白質、以及高脂肪嘅飲食方式,就可以令身體嘅醣類含量夠低,開始進入營養性酮症嘅代謝狀態,達到燃燒脂肪嘅效果。

以主要營養比例嚟講,要進入穩定嘅營養性酮症,每日飲食需要攝取大約 70~75% 嘅脂肪、 20~25% 嘅蛋白質、並限制醣類嘅攝取喺 5% 左右。簡單嚟講,就係要盡量避免進食澱粉同糖類食物,好似係粉、麵、飯等主食同水果都唔適合。然後要多食高油脂嘅食物,例如係五花腩、煙肉、芝士、牛油果等食材,再配搭大量橄欖油、牛油、椰子油等食油嚟烹調。

間歇斷食同生酮飲食有咩分別?邊種飲食方法比較好?

睇落兩種嘅飲食方式好似好唔同,但其實「間歇斷食」同「生酮飲食」本質上嘅原理同想達到嘅效果係一樣:就係令身體以燃燒脂肪嚟到取代葡萄糖作為能量來源。至於兩者差別在於「間歇斷食」係透過消耗血液中嘅醣類令身體燃脂;而生酮飲食就係透過減低源頭所攝取嘅醣類令身體燃脂。

所以其實冇話邊種飲食方法一定會比較有效,最緊要係選擇合適自己嘅飲食方法,因為每個人嘅體質、作息習慣、用餐時間同喜好都唔同。無論係邊種飲食方法,關鍵都係要持久咁進行,先至可以令身體進入酮適應,習慣以燃燒脂肪嚟提供身體能量。否則如果要格硬進行一種你身體唔適應嘅飲食模式,唔單止達唔到消脂效果,更會對身體健康造成傷害。

假如你平日生活好忙碌,冇時間準備對營養比例要求較高嘅生酮飲食餐單,甚至係連食飯都冇咩時間嘅話,「間歇斷食」可能會比較適合你;但如果你係本身已經唔鍾意食澱粉質類食物,又或者係你捱唔到肚餓,一處於飢餓嘅狀態就會容易暴躁易怒同無法專心嘅話,「生酮飲食」就可能對你嚟講更有效。亦都有人會因應唔同階段嘅作息習慣,選擇配搭兩種嘅飲食方式交替進行。

如果你唔太清楚邊種飲食方法更加適合你嘅話,歡迎向哋嘅專家諮詢!特別係如果你想配合運動同時期進行,就更需要注意飲食方式,我哋嘅專業教練團隊可以為你制定一套最合適你嘅運動飲食計劃,達到最好嘅消脂效果!

Share on facebook
Facebook
Share on telegram
Telegram
Share on whatsapp
WhatsApp
Share on email
Email

閱讀更多文章

Leave a comment

你的電郵地址並不會被公開。 必要欄位標記為 *

× 查詢健身課程